Ang kanamit kag kasakit sa una nga paghigugma

Matuod gid ra nga harambalun... "kanami guid sa pamatyagun kun ikaw ang naga higugma, ilabi run guid kung imo una nga eksperyensya".

Kun akun madumduman, ako naka batyag ang ginatawag nga pag higugma kang akun tiempo kang sekondarya. Sangka simple pero mabuot kag gwapa ang akun gina bantayan sa eskwela. Permi ako aga ga bugtaw para magpanghimus mag-agto sa eskwela. Kanami kang akun pamatyagan kung akun makita sa aga ang akun ginahandum nga maging nobya. Naga ngirit ako halin mag umpisa ang klase sa aga asta mag abot ang katapusan nga oras antis mag tag irigma. Una gid ako kara permi mag gwa sa klasrum para lang makita ang akun gina higugma antis tana mag uli kanada.

Antis mag umpisa ang klase sa hapon akun ginabantayan sa sagwa klasrum ang akun gina handum. Makita ko lamang tana nga ga pasulod sa anda kwarto akun dughan iba guid ang ginakubakuba. Asta nga matapos ang klase sa sangka adlaw, ang akun dughan naga kadlaw. Daw anu kanami ang imo pamatyagan kung ikaw may ginahigugma sa eskwela .

Nag ligad ang mga inadlaw nga wara guid mag iba akun baratyagun para kana. Nangin inspirasyun ko tana sa akun adlaw adlaw nga pag eskwela. Ginaganahan ako mag tuon kun tana akun gina panumdum. Naging mayad ang akun mga grado sa eskwela bangud sa akun paghigugma kana.

Nagliligad ang mga inadlaw, tana man gihapon ang akun gina binantayan. Sa mga adlaw, semana kag binulan nga nagliligad sa akun panurukan wara guid ti mag lapaw sa ana ka gwapahan. Pero ang problema ko, sa kaduruhun kang estudyante sa amun eskwelahan, ako sangka ultimo ordinaryo nga estudyante matugruan na ayhan ka pagtamud bisan gamay? Sa akun paghunahuna daw indi na guid matugruan tiempo nga makita kung anu ko tana  ginahigugma.

Sangka adlaw akun tana  nakita nga daw kanami ana nga yuhum galantaw kanakun. Ang akun tagipusuon daw malupok sa kasadya hay sa pag kabuhay-buhay ka tiempo, kadya ko lang naman-an nga nakilala na man gali kahit paano. Sa mga oras nga ato isara sa pina kasadya ko nga na eksperyensyahan, daw pareho kang gina hambal kang iban, kun anu kanami kang pamatyagan. Daw galutaw ka lang sa kalangitan. Ako daw natapungawan sa tiempo nga ato. Tana akun ginalantaw samtang nga tana gaparapit pa agto sa lugar kun diin ako gatindug. Sa akun paglantaw daw anu kanami ang ana pagkayuhum. Ang akun nabatyagan daw malupok ang akun dughan. Samtang gaparapit tana sa lugar kun diin ako gatindug, akun gina paminsar kun anu ang akun nga harambalun. Sa tiempo nga tana rapit run kanakun, siguro sa kasadya kag sa kakulba, wara guid ti may nag gwa sa akun baba kundi ang kataga nga. Kmusta? Tana nag lantaw kag yuhum kanakun.  Nag sabat mayad man a! Pamatyagan ko daw sa langit lang ako. Indi ko ma man-an anu himuon ko makadlaw tudo-tudo ukon magtumbo kag mag singit "yohoo".

Pero urihi ko run na rialisar nga ang ana nami nga yuhum indi gali para kanakun. Sa akun pagtalikod may sang ka estudyante gali, ana klasmet nga naga tindug, gapamaypay kana. Indi ko maman-an kun anu akun himuon. Namayha ako sa mga tawo nga naka kita kang akun sitwasyun. Nagpa kunokuno ako nga iba man akun gina yuhuman. Pero sa mga tawo nga naka kilala sa akun, indi guid ako maka pakuno-kuno hay tanda mismo naka maan kung anu ko ka gusto ang babahi nga ato.

Nagliligad ang mga inadlaw, akun nabatian kag naman-an nga naging tanda run gali kang ana nga klasmet. May naghambal kanakun nga buhay run ra gali naga pangaluyag ang ana nga klasmet kana. Sang akun naman-an ang isturya, ako naduraan kang gana mag-eskwela. Na realisar ko, ang nag tugru katu kanakun kang inspirasyun nga magtuon kamayad, amu man ra gali mag tugro kanakun ka rason kung andut indi ako mag-eskwela. Pira ka adlaw nga wara ako nag sulod sa amun klase. Kun ako present man, wara ako ti gana mag pamati sa gina hambal kag gina leksyun kang amun maestra.  Wara ako ti gana magtuon kun ako maka uli sa amun balay.

Nagligad ang mga inadlaw, akun man na amat-amatan batun ang akun kamalasun sa paghigugma. Bangud sa natabo, ridto ko na realisar nga siguro indi pagid man katapusan kang kalibutan. Duro pa nga mga babayi ang akun makilala sa urihi. Pero may leksyon man ako nga naman-an sa sitwasyun nga akun naagyan. Sa paghigugma indi ka mag ekspektar kang puro kanamit lang permi kundi ikaw man maga ekspektar kang posible nga kasakit nga imo pwede ma aguman...

Akun gina binagbinag ang harambalun nga dya. "Nothing hurts more than realizing she meant everything to me, but I meant nothing to her." hahahaha
                                                                            - a creation of Author's wild imagination...